Verlos tog, HERE! Dit is wat ons nodig het. 'n Reddende God! Dit is waarna ek en jy smag! Is daar iemand wat bewys het dat hy die God van verlossing is naas ons God? Hy wil jou vandag daarvan verseker!
Miskien is dit geskryf toe Saul en die res van Israel hom agtervolg het. Dit was die verbondsvolk wat hom agterna gejaag het. Dit was die verbondsvolk wat Jesus aan die Romeine oorgegee het. Dit gaan nie oor mense ver weg nie. Dit gaan oor ons.
Dawid leef in 'n tyd van geestelike verval, en dit lyk asof niemand daarbo uitstyg nie. Soos 'n maalkolk suig die kultuur almal daarmee saam af ondertoe. Daar is niemand oor nie. Verlate. Alleen. En hy gaan na God toe.
Dit is die verskil tussen 'n kulturele Christendom en 'n ware Christendom. Mense sal kla oor hoe sleg die kultuur en die kerk word en by mekaar brom en kerm, maar ‘n ware Christendom sal tot God bid oor die verval van die kultuur of die verval van die kerk met die verwagting dat God sal antwoord. Die ongelowige kla, en die gelowige bid of gaan na die gebedsbyeenkoms.
Die gelowiges het verdwyn!
- Die gebed (1-4)
- Die antwoord (5-8)
Die gebed
“Verlos tog, HERE!” Hoekom? Om drie redes.
Die eerste is: “Want daar is nie meer getroue volgelinge nie; die betroubares onder die mense het verdwyn." Die godvresende mens is weg en geloof het verdwyn. Hy kyk rond en sê: Daar is niemand wat jou beïndruk met 'n gevoel van heiligheid, geregtigheid en diep karakter nie.”
In ons kultuur vandag is dit so maklik om 'n ‘beïnvloeder’ (smaakmaker) te soek, eerder as getroue mense. Soos een predikant opgemerk het: Ons grootouers het hul oë op helde gevestig, ons vestig ons oë te gou op afgode. Wat bedoel ek? Die verskil is karakter. Karakter is nie meer belangrik by die vir wie ons volg en verafgod nie. Wat weet jy van die karakter van die wat jy volg? Ons samelewing is behep met afgode. Selfs as dit kom by ons leiers. Jy hoor al hoe meer mense sê, en ek het dit van my vriende in die Verenigde State gehoor: 'n Man se karakter maak geen verskil wanneer dit by beleid kom nie. Dit is egter nonsens – in die wêreld en nog meer in die kerk. Hoe kan ek 'n man vertrou om 'n nasie te lei as hy homself nie kan beheers nie?
Selfs in die kerk luister ons na allerhande leraars, maar ons weet so min van hulle lewe. In die kerk vergelyk ons onsself met ander, en voel dat ons goed doen, en vergeet dat God die maatstaf van heiligheid is.
En wanneer jy daardie maatstaf gebruik, is daar net Een wat goddelik is. Hy wat, as Dawid se kleinseun, hierdie lied meer volledig gesing het!
En wat gebeur as daar nie meer getrouheid is nie? Die volgende stap in verval volg – leuens floreer. In huwelike, in gesinne, in die samelewing. Wanneer die goddelike verdwyn, word woorde goedkoop. "Die een mens belieg die ander;" Ons het meer fynskrif as ooit tevore. Is jou woord jou woord? Dit is die evangelie wat die wêreld verander het en gewig aan ons woorde gegee het. Sonder die evangelie – sonder die Woord van God – is woorde leeg.
Tweedens: Wanneer ons die evangelie uit die oog verloor: "... met vleiende lippe praat hulle uit twee monde." Die oorspronklike is: ' 'n Hart en 'n hart': een hart vir die vriende by die kerk, 'n ander vir die vriende van die wêreld; een vir Sondae, 'n ander vir werksdae; een vir die koning, 'n ander vir die armes. Soos een predikant oor hierdie vers sê: " 'n Man sonder 'n hart is 'n wonder, maar 'n man met twee harte is 'n monster."
Die een vir wie hulle geroep is om lief te hê – die naaste – is die een vir wie hulle lieg. Weer eens, ons leef in 'n wêreld waar woorde goedkoop is. Vleiery is aan die orde van die dag. Jy weet wat mense aan jou kant sal kry, en jy praat met hulle. Jy is nie bekommerd dat hulle aan God se kant is nie! Hierdie profete, herders en lidmate sê net wat ander wil hoor of wat aanvaar word as gepas, in plaas van hul ware gedagtes, gevoelens en dade. Hulle gee nooit aanstoot nie; hulle konfronteer nooit nie. En niemand groei ooit nie – almal is net opgeblase.
Vleiery maak 'n man met ware karakter leeg. Spreuke 26:28 sê: " 'n Vals tong haat dié wat hy verpletter het en ‘n gladde mond bewerk ‘n ramp." Of Spreuke 28:23: "Wie 'n mens teregwys, ervaar daarna goedgesindheid, meer as hy wat vlei met die tong.” Vleiery en leuens is die grootste hulpmiddels in Satan se werkswinkel. Die rede waarom Christus gesterf het, is omdat ons vir Satan se vleiery geval het dat ons gelyk aan God kan wees.
En hierdie leuens lei tot 'n plundering van die armes. Kyk verder aan na vers 6: "Vanweë die geweld teen die magteloses, die gesug van die behoeftiges..." Hier word woorde uit die finansiële wêreld gebruik. As gevolg van die leuen word mense onderdruk, die lewe is skrikwekkend, daar is konstante onsekerheid. Ons sien dit as plekke van sonde ... die armes word uitgebuit. Daar is mense in ons land wat 50-100% rente op lenings betaal omdat hulle nêrens anders heen kan gaan nie – dus gaan hulle na 'n sogenaamde ‘loanshark’. En hulle gaan ten gronde weens hierdie lenings.
Soos dit in materiële opsig gaan, so gaan dit in geestelike opsig ook. Ons gaan êrens anders heen as na die HERE wat kan voorsien. Ons probeer om ons behoeftes te bevredig met wat die wêreld, of Satan, of sonde bied – en op die ou end is die prys die dood. Ons is bereid om ons siel aan die duisternis te verkoop om te vind waarna ons soek. Maar ons skuld is teen God – en God alleen kan ons bevredig. Satan is 'n ‘loanshark’. Hy sal jou lewe neem en niks teruggee nie.
Liewe gemeente, wanneer ons onsself nie meer as arm sien nie en dat ons daagliks uit genade leef – dan dink ons ons het ons rykdom verdien, en die armes is arm omdat hulle onwaardig is. Ons Here identifiseer met die armes. Hy is tot die einde toe geplunder – tot die klere op sy rug is letterlik weggedobbel!
“Mag die HERE al die vleiende lippe uitroei, die tonge wat grootpraat, hulle wat sê: ‘Danksy ons tonge is ons sterk; ons lippe is onder ons beheer. Wie is heer oor ons?’ " Dit herinner ons aan Jakobus waar hy praat van die krag van die tong om lewens te vernietig en ons hele lewensweg aan die brand te steek. Ons het dit almal al ervaar. Probeer altyd om onsself te regverdig. Probeer altyd 'n manier vind om vooruit te kom. Hierdie monde moet gesluit word. Om te sê: nee, jou tong sal jou nie red nie. God sal die tong afsny wat grootpraat! Hoe? Ons lees in Romeine: "Ons weet dat alles wat die Wet sê, gerig is aan diegene wat onder die Wet staan, sodat elke mond die swye opgelê kan word, en die hele wêreld hulle voor God moet verantwoord.”
Voordat redding kan kom, moet die monde toegemaak word. Sodat hulle verby hulle eie tong kyk vir redding.
Die antwoord
“Vanweë die geweld teen die magteloses, die gesug van die behoeftiges, gaan Ek nou opstaan, sê die HERE.” Moet nooit dink dat God nie hoor nie. Deur die geloof is jy nooit alleen nie! Dink daaroor. Ek sal jou nooit alleen laat nie, nooit sal ek jou verlaat nie; die Here is my Helper!
Die HERE hoor die uitroep: “Verlos tog, HERE!" van vers 1. En Hy staan op! Hoekom? As gevolg van die gesug van die behoeftiges! As gevolg van die klaaglied van sy volk staan Hy op! O, as ons maar tot die HERE in gebed sou roep! As jy onderdruk voel. Alleen. Bid! Dat Hy sal opstaan! En dit deur sy mag.
"Ek sal hulle wat daarna smag na veiligheid bring." Waarna verlang jy? Sekuriteit? Hoop? 'n Plek wat niemand kan inneem nie, 'n plek wat selfs die dood nie van jou sal steel nie. 'n Huis. Dit is waarvoor jy hier na die tafel kom. Te midde van die vyande, diegene wat leuens vertel, berei Hy die tafel vir ons voor. En Hy sê: Ek sal dit doen. Ek sal jou in 'n plek van veiligheid ver buite bereik plaas. Dit is die werk van God. Deur die geloof wat jy vandag bely, is jou lewe saam met Christus verborge in God! Hy het vir ons daardie plek van veiligheid gegee.
Wat gee hierdie sekuriteit? Hoe kan jy hiervan seker wees? Dit is God se Woord wat jou sekuriteit gee. Sy Woord is waar. God se Woord aan jou vandag is volmaak. 'n Woord waaraan jy nie hoef te twyfel nie. Dit word sewe keer gereinig. "Die HERE se woorde is suiwer woorde, silwer wat gelouter in 'n smeltoond in die grond, dit is sewe maal gesuiwer.” Die mens se leuens en vleiery sal net verslind en 'n kultuur vernietig – maar die Woord van die HERE is rein. Volmaak. Sewe maal is die getal van volheid. Van volmaaktheid. Ja, dit is die Woord van ons Here Jesus. Dit sê oor Hom in 1 Petrus 2:22: "Hy wat nie sonde gedoen het nie, en in wie se mond geen bedrog gevind is nie." Daar is nie 'n sweempie van twyfel nie, nie die kleinste fout van onsekerheid nie. Sy karakter (geen sonde) en sy woorde (geen bedrog) stem perfek ooreen.
Soos een skrywer sê: "Die Woord van God kan in elke opsig vertrou word. Dit is goed, suiwer en deeglik getoets. Dit is ook deur die eeue deur studente, geleerdes, kritici en twyfelaars getoets – en die Woord van God staan steeds. Dit is soos 'n magtige aambeeld wat ontelbare hamers verslyt het wat daarop geslaan het. Dus, ek sê vir jou sê op grond van die Skrif, en God bevestig dit aan jou met 'n teken, dat jou sondes vergewe is en dat jy syne is! MOENIE DAARAAN TWYFEL NIE. Jesus, die getroue Getuie, is vir jou. En jy is veilig in Hom. Stort julle harte uit! En wees in Hom 'n volk van die waarheid! GEEN leuens, geen vleiery en geen onderdrukking kan lank bestaan waar hierdie God woon nie. Wanneer Hy opstaan!”
“U, HERE, moet hulle beskerm; U moet elkeen altyd veilig hou teen hierdie geslag." Wie of wat sal die Here bewaar? Die mense wat Hy in veiligheid geplaas het, of sy woorde? Die naaste referent is sy Woord. Die HERE sal sy Woord bewaar – en deur daardie Woord sal Hy ons bewaar teen hierdie geslag. Ons kan dit as waar aanvaar dat God beide sy Woord en sy volk sal bewaar. Want sonder sy Woord sou sy volk nie bewaar word nie.
Een kommentator sê: "Soos silwer sy eienaar verryk, so verryk die Woord van God sy minnaars. Niks versterk die intellek so, maak die oordeel skoon, vergroot die uitsigte, suiwer die smaak, maak die verbeelding lewendig en voed die hele mens op."
En ek sou graag wou sê dat dit die einde van die Psalm is. Maar die effens irriterende ding met die eerste oogopslag is dat dit nie die einde is nie. Ons wil dit dalk die einde maak. Maar Dawid voeg nog een vers by. "Oral loop goddeloses rond, terwyl die gemeenheid van mensekinders hoogty vier.” Dit lyk asof niks verander het nie!
O NEE, alles het vir Dawid verander, al het niks in die wêreld verander nie. Sy klaaglied is begroet met die onvernietigbare hoop en sekuriteit wat in die Woord gevind word! Dit herinner ons aan Jesus se woorde in Johannes 17: "Ek bid nie dat U hulle uit die wêreld moet wegneem nie, maar dat U hulle van die Bose bewaar." Of in Romeine 8 waar Paulus vir ons 'n lys van tragedies gee, soos hongersnood, naaktheid, gevaar, swaard, en dan sê hy: "IN al hierdie dinge is ons meer as oorwinnaars.” Hy neem ons nie uit gevaar nie – maar sy Woord dra ons daardeur! Daar is baie wat tussen die eerste en laaste vers van die Psalm gebeur het. God het opgestaan! Ja, in Christus is Hy ons veiligheid! Dit is hoekom ons hierdie maaltyd nodig het, om weer daaraan herinner te word!
Amen.