Geliefde gemeente,
Ons is almal op soek na ’n perfekte wêreld – ’n wêreld waar vrede heers, waar ons nooit bang hoef te wees vir die toekoms of misdaad nie, ’n wêreld waar ons in veiligheid en sekuriteit mag lewe. Geen bekommernisse vir die res van ons lewe nie. ’n Probleemvrye filosofie. Dit is hoekom sommige mense immigreer. Hulle soek ’n beter land.
Om ’n perfekte wêreld te hê, het jy perfekte leiers nodig. Dit is hoekom sommige mense so passievol is oor politiek, want hulle weet dat Suid-Afrika se leiers regverdig, wys en goed moet wees om suksesvol te wees. Maar ook baie magtig – in staat om te doen wat regverdig, wys en goed is.
Maar ons almal ken die probleem. Sonde. Sonde besmet elke menslike hart en raak elke vlak van die menslike samelewing. Dank God vir Jesaja 11. Dit is nie ons wat hierdie land gesoek het en hierdie land bou nie; dit is God wat na ons toe kom in ons armoede, en hierdie koninkryk vestig.
Die Koninkryk van God is hier
- Die Koning
- Sy identiteit
- Sy wysheid
- Sy geregtigheid
- Die Koninkryk
- Vrede
- Groei
Die Koning
Sy identiteit
Onthou Jesaja 11 vorm deel van ’n groter geheel (Jesaja 7–12), met Jesaja 6 wat soos ’n skarnier tussen die twee funksioneer. En Jesaja 6 het geëindig met die woorde van hoop: “Die stomp van die land is ’n heilige geslag.” En die eerste woorde van hoofstuk 11 is: “Maar ’n takkie sal spruit uit die stomp van Isai, en ’n loot uit sy wortels sal vrugte dra.” Die heilige geslag (saad) dra vrug! Hier vind ons uit wie hy gaan wees – die seun van Isai! Isai wat die vader van koning Dawid was!
Maar kyk ook verder, na vers 10, die slot van die beskrywing van die koning en die koninkryk: “Op daardie dag sal die wortel van Isai...” Vers 1 sê hy is die takkie van Isai, en vers 10 sê hy is die wortel! Hy is beide die seun van Isai, en die voorgeslag van Isai! Hoe is dit moontlik?! Hy is beide Dawid se Heer en Dawid se seun! Hy is beide mens – wat ruimte en tyd binnegaan – en God – wat voor alle dinge was! Hy is die beloofde Een wat die rede is vir die geslag van Isai. Dit is niemand anders as Jesus Christus nie. Dit is die magtige en verhewe – hoog en verhewe Een – van wie in Jesaja 6 gepraat word! Dit is God self – wat die Seun van Dawid word!
Te midde van al die oorloë en vernietiging van daardie tyd – toe koninkryke die nasie Juda en Israel verskeur het – is al wat oorgebly het, ’n stomp. Stel jou voor jy kap ’n groot boom af, en al wat oorbly is die stomp. Wie sou dink dat die stomp ooit weer sal lyk soos die boom wat afgekap is? Stede word afgebrand, jou gesin word gevange geneem, en die land word ingeneem! Dan herinner God sy volk daaraan dat dit nie verby is nie! Dit is die Woord van die Here – daar kom ’n Koning wat anders is as enige koning wat al was of ooit sal wees.
Sy wysheid
Die sewevoudige uitwerking van die Gees en sy werk gee die aanduiding dat hierdie persoon die volheid van die Gees sal ontvang: “Die Gees van die HERE sal op Hom rus – die Gees van wysheid en insig, die Gees van raad en sterkte, die Gees van kennis en ontsag vir die HERE.” Hulle is regeer deur konings wat swak, trots, ongehoorsaam en opstandig was. Selfs die sterkstes het geval en onverstandige besluite geneem. Maar nie hierdie Koning nie. Hy sou volmaakte wysheid en insig hê en die krag om sy volmaakte plan uit te voer.
Die “raad en sterkte” verwys na militêre strategie en mag. Maar hierdie wysheid, raad en sterkte sou nie soos die wysheid van die wêreld wees nie; dit sou vir die wêreld na dwaasheid lyk. Die wêreld se wysheid sê dat as jy ’n wêreldveranderende beweging wil bou, moet jy die slimste mense bymekaar kry, en dan jou visie en einddoel duidelik maak. Daarna moet jy begin beplan. As jou visie en einddoel was om jou onderrig sentraal te laat staan in die helfte van die wêreld se beskawings, om 2,5 biljoen mense te laat bely dat hulle in jou glo, en om die rigting van die wêreldgeskiedenis te verander – wat sou jy doen om daardie doelwitte te bereik?
Jy sou nie gebore word in ‘n krip in ’n stal met die reuk van urine en mis wat in die lug hang nie – in armoede nie. Jy sou nie buite alle ekonomiese, sosiale, politieke of akademiese magsentrums bly nie. Jy sou nie op 30 begin met die bediening en dan drie jaar later aan ’n kruis sterf nie. Die dwaasheid van die mens is die wysheid van God, en die wysheid van die mens is die dwaasheid van God.
Hier was ’n man van wysheid en vertand. Hy het geweet hoe om perfek in hierdie wêreld te leef en te regeer – en presies die regte besluite te neem. Sy heerskappy is perfek. Dit is so anders as die politieke leiers van ons tyd – selfs die wysstes neem dwase besluite. Selfs die wysstes en diegene wat die beste vir hul mense wil hê, neem besluite wat nie in hul land se beste belang is nie. Nie hierdie Koning nie. Dit is jou Koning.
Die wysheid van die mens sê vertrou op die mens se manier van doen, vertrou op jou strydwaens en perde. Vertrou op jou kontant, steun op jou eie insig. Maak seker dat mense van jou hou. Maar hier is ‘n Mens wat nie vir mense gelewe het of uit vrees vir mense geleef het nie, maar vir God. Want die begin van wysheid is nie die vrees van ’n mens nie, maar die vrees vir die HERE. Vers 3: “Hy sal genot put uit ontsag vir die HERE.” Dit is wonderlik – iemand wat behae het in die vrees vir die HERE. Ontsag en genot hoort nie bymekaar in ons woordeskat nie. Ons put nie genot uit dit wat ons vrees nie – nee, ons vrees dit wat ons vrees. Maar al sy bekwaamheid om hom te verlustig is gefokus op die HERE en om Hom te gehoorsaam en te vrees en niemand anders nie.
Sy geregtigheid
En omdat sy wysheid volmaak is, sy krag almagtig is, is Hy in staat om dinge reg te stel. “Hy sal nie 'n beslissing vel volgens wat sy oë sien nie, en nie teregwys volgens wat sy ore hoor nie.” Dit herinner ons aan hoe Dawid gekies is. Hy is nie gekies op grond van wat die mens kan sien nie, maar op grond van sy hart. Die meeste foute wat ons maak, ontstaan bloot omdat ons oordeel op grond van wat ons sien en hoor, en omdat ons nie by die kern van die saak uitkom nie. Maar God kyk na die hart. “Hy sal regverdig beslis oor die armes, en die magteloses van die land billik teregwys.” Wanneer ons die woorde “regverdig beslis” en “teregwys” (1953-vertaling: “geregtigheid” en “oordeel”) hoor, dink ons aan straf, maar dit beteken basies om reg te stel! Die armes is die eerstes wat ly, die eerstes wat mishandel word wanneer onreg geskied. Hulle sal vir laer lone werk, want hulle het nie ’n keuse nie. ‘n Mens kan maklik voordeel daaruit trek. Maar nie hierdie Koning nie! Die eerstes wat verpletter word, is die eerstes wat opgehef word. Hy sal die armes en nederiges ophef en die selfgenoegsames en trotses verbrysel. Sien jy die omgekeerde waardes van die wêreld!?
Maar alle rykes en armes sal billik beoordeel word.
Dit is wat die Koning self in die Nuwe Testament sê: “Gelukkig is die armes van gees, want aan hulle behoort die koninkryk van die hemele.” En later: “Gelukkig is die sagmoediges, want hulle sal die aarde erf!”
Maar wat sal Hy met die verdrukker doen? Dieselfde as wat Hy met Egipte gedoen het! Maar hierdie keer met die uiteindelike onderdrukker. “Hy sal die land slaan met die stok van sy mond, en met die asem van sy lippe die goddelose doodmaak.” Die Koning het geen magsvertoon nodig nie, en geen wapen – buiten sy Woord – om sy woord af te dwing nie. Die asem van sy lippe dui op die krag van God om verandering te bewerkstellig en sy wil af te dwing! Die goddelose hier is enkelvoud. Die groot onderdrukker van God se volk sal vernietig word! Dit is die finale vernietiging van die vyande van die mens vir eens en vir altyd. Satan sal uiteindelik vernietig word – soos ons in 2 Tessalonisense 2:8 lees: “En dan sal die wettelose mens geopenbaar word, die een vir wie die Here Jesus deur die asem van sy mond sal uitwis – ja, Hy sal hom deur die glans van sy verskyning vernietig.”
Ons het nou gekyk na die identiteit van die Koning, die wysheid van die Koning en die geregtigheid van die Koning. Kom ons kyk nou na die koninkryk.
Die koninkryk
Vrede
En as gevolg van sy heerskappy sal daar vrede wees. Opbloei. Vreugde. En die aarde sal vol wees van die kennis van die HERE soos die waters die see bedek.
Hy sal die gevolge van die sonde ongedaan maak. Toe die sonde die wêreld binnegekom het, is die wêreld gevul met geweld, sonde en dood in plaas van met die heerlikheid van God (Gen. 6:5–6, 11–12). Maar nou, deur die soewereine Koning, belowe God om deur ‘n mens die regmatige heerskappy van ’n mens oor die skepping te herstel deur die Bose, die sonde en die dood te verslaan. So sal Hy die wêreld herstel sodat vrede en geregtigheid weer heers, ’n wêreld waar die leeu by die lam sal lê, waar ’n klein kindjie hulle sal lei, en waar elke slang sy skadelike natuur sal afwerp (Gen. 3:15).
Vers 6–9 herinner aan die ongerepte begin van die skepping en die beeldspraak van die tuin van Eden. Hier, onder die heerskappy van hierdie volmaakte Koning, is volmaakte vrede en vreugde. Hier is God se finale voorneme met die mens. ’n Nuwe aarde. Werklik. Tasbaar. Voelbaar. Lekker. Proe, voel, sien en hoor. In vers 6 is daar versoening tussen ou vyande. In vers 7 is daar ’n verandering van die natuur van die skepsels. Die koei en die beer eet dieselfde kos, net soos die leeu en die os. En laastens word die vloek verwyder. Dit eggo dit nie net nie, maar dit oortref selfs vir Eden. Dit gaan oor die herstel van alle dinge aan God deur die Koning!
Maar eers met die eerste Kersfees het hierdie dinge begin gebeur. Hy het nie net die evangelie verkondig nie, Hy het die hongeriges gevoed, die siekes genees en die dooies opgewek. Die koms van ons Here, die takkie en wortel van Dawid, was die koms van die koninkryk op aarde. Met Jesus het die koninkryk van God gekom! Ons begin nou lewe as deel van daardie koninkryk.
En Hy het gekom om te vestig. Ware vrede! Blywende vrede. Skeppingsvrede. Dit gaan nie net oor die vergifnis van mense nie; dit gaan oor die herstel van die heelal en die verlossing uit slawerny ná knegskap. Dit is geen wonder nie dat Paulus in Romeine 8:18–19 sê: “Ek is oortuig dat die lyding van die huidige tyd nie vergelyk kan word met die heerlikheid wat bestem is om aan ons geopenbaar te word nie. Met vurige verlange wag die skepping daarop dat die kinders van God openlik bekend gemaak sal word.” Dit is die prentjie wat Jesaja vir die mense van sy tyd probeer skets. Lyding is onvermydelik – maar dit vergelyk nie met die heerlikheid wat geopenbaar sal word nie!
O om deel te wees van hierdie koninkryk van die Seun van Dawid wat vrede bring ná Eden, ná Salomo. ’n Blywende, totale vrede. Wie eet gewoonlik lammetjies? Wolwe! Nie hier nie! Wie eet gewoonlik bokkies? Luiperds! Nie hier nie! Wie eet gewoonlik kalwers? Leeus! Nie hier nie!
En wie moet dit alles regeer en lei en rentmeesterskap beoefen? ’n Klein kindjie. Nie ’n sterk macho man nie. Nie ’n koning of ’n prins nie maar ’n kind. Dit eggo wat Jesaja 9 gesê het: “Want ’n kind is vir ons gebore, ’n Seun is aan ons gegee. Die heerskappy is op sy skouer!”
Want die geringste sal die grootste genoem word in die koninkryk van die hemele. ’n Prentjie van vrede. Van rus. Diegene wat hier die meeste in gevaar is, diegene wat die meeste mishandel word, word beskerm, bewaak, en hulle speel met die adder. Die slang sal nie meer pik en die saad van die vrou vernietig en seermaak nie – maar die saad van die vrou sal nooit enige vrees hê nie. Want: “Mense sal nie kwaad doen of hulle wangedra nie – nêrens op my hele heilige berg nie.” En hoekom nie? Want ons sal uiteindelik almal die HERE KEN! “Want die land sal vol wees van die kennis van die HERE, soos water die see bedek.” Daar is sekerheid dat dit sal gebeur! God sal oral in heiligheid teenwoordig wees, en op elke plek sal kennis van Hom ten volle geniet word. O, geliefde gemeente, dit is ’n oproep tot sending! Dit is ’n oproep om die evangelie van die Koning en Koninkryk te deel! Dit bring ons by die laaste punt.
Groei
Hoe kom mense hierdie koninkryk binne? In en deur die Koning! “Op daardie dag sal die wortel van Isai as banier vir die volke bly staan – die nasies sal daarna vra, en sy rusplek sal luisterryk wees.” In Jesaja 5:26 is die banier gebruik om die nasies op te roep tot oordeel teen Israel. Nou roep die banier die nasies op tot die seëninge van die Messias. Die Banier is ’n teken van oordeel en seëninge! Oordeel oor diegene wat die oproep nie sal hoor nie, en seën oor almal wat die oproep hoor! Jesus is die Banier – die teken vir die volke. Kom na MY, sê Hy, om rus te vind!
En wat is daardie banier presies? Dit is die kruis! Johannes 12:32–34 sê: “‘En as Ek van die aarde af verhoog word, sal Ek almal na My toe trek.’ Dit het Hy gesê om aan te dui watter dood Hy sou sterf.” Geliefde gemeente, weet jy wat die skare se antwoord daarop was? Die skare het hom geantwoord: “Ons het uit die wet gehoor dat die Christus vir ewig bly, en hoe sê u dat die Seun van die Mens verhoog moet word? Wie is hierdie Seun van die Mens?” Hy is opgehef en dit was nie meer net vir die Jode nie, maar vir die nasies! Die heidene sal Hom raadpleeg! Dit was die kruis van Christus wat verkondig is – sy dood en opstanding en die middel waardeur Hy alle dinge oorwin het en besig is om alles met Homself te versoen!
En hoe doen Hy dit? Hy vergader sy volk vanuit die vier uithoeke van die aarde. God sou nie sy volk loslaat nie; Hy sou sy volk nuut maak, en hulle vul met sy eie Gees. Hoofstuk 11:11–12 herinner ons aan Handelinge 2:5–6 nie; 9–11: “Destyds het daar vroom Jode uit elke nasie onder die hemel in Jerusalem gewoon. Toe daardie geluid opklink, het die menigte saamgedrom, en was verward, omdat elkeen gehoor het hoe daar in sy eie taal gepraat word [...] Ons – Parte en Meders en Elamiete, inwoners van Mesopotamië, Judea en Kappadosië, Pontus en Asië, Frigië en Pamfilië, Egipte en streke van Libië in die omgewing van Sirene, en Romeine wat hier vertoef, Jode en proseliete, mense van Kreta en Arabiere – ons hoor hulle in ons eie taal oor die groot dade van God praat.”
Daar is nie meer die oordeel van verstrooiing nie, maar die seën van versameling! Selfs Israel wat na Assirië verban is, was daar met Pinkster! ’n Weg is oopgemaak! En die doodsvyande van God sal uiteindelik die knie buig as ’n nuwe uittog, die laaste en grootste uittog, plaasvind, soos Jesus self in die rivier van oordeel instap sodat ons op droë grond kan deurgaan!
Soos die Gees van God op die Gesalfde neergedaal het, so daal Hy op ons neer. Dit is verstommend dat die woorde van die begin van hierdie hoofstuk – waar ons lees van die Gees van wysheid en insig wat op Jesus rus – dieselfde woorde is as wat Paulus oor die kerk bid, wat deur die uittog van sonde en Satan gegaan het en in die koninkryk van God gekom het. Weer eens is hierdie wysheid dwaasheid in die oë van die wêreld. Wat gebeur wanneer die mense vir die kerk sê om met die tyd saam te gaan, om op te hou om al daardie simpel wonderwerke te glo, en om daardie dinge te verkondig waarmee almal saamstem? Ek dink die bewyse in daardie kerke spreek vanself. Maar die evangelie van Christus – die dwaasheid van die mens – gaan voort om soos ’n veldbrand oor die vastelande van Afrika, Asië en die Midde-Ooste te versprei.
Let op hoe Paulus se gebed in Kolossense eggo wat hier aan die gang is.
Paulus bid: “Daarom dan, van die dag dat ons dit gehoor het, hou ons nie op om vir julle te bid nie. Ons bid dat julle vervul mag word met die volle kennis van God se wil, deur al die wysheid en insig wat die Gees gee, om 'n lewe te lei wat die Here waardig is, en Hom in alles tevrede te stel, terwyl julle vrug dra deur elke goeie werk, en groei in die kennis van God, en deur die mag van sy heerlikheid al die krag ontvang om geduldig in alles te volhard. Met blydskap moet julle die Vader dank, omdat Hy julle geskik gemaak het om deel te hê aan die heiliges se erfdeel in die lig. God het ons uit die mag van die duisternis gered, en verplaas na die koninkryk van sy geliefde Seun – deur wie ons bevryding, die vergifnis van sondes ontvang het.”
En weer in Efesiërs 1: “Dan bid ek dat die God van ons Here Jesus Christus, die Vader van die heerlikheid, vir julle dit sal gee: geestelike wysheid en openbaring, wat in die kennis van Hom bestaan.”
Dit is die HERE wat tot die stryd toegetree het, wat die vyand vir sy volk oorwin het. Dit is die HERE wat die “tong van die Egiptiese See” (v.15) heeltemal vernietig het. Dit is die HERE se asem wat die see laat opdroog het, sodat ons in hierdie beloofde land ingelei kon word. Dit is die HERE wat my en jou huis toe lei. DIT IS DIE HERE – die Een wat getrou is aan sy verbondsbeloftes! En Hy het die Gees van die verbond – die Gees van die Gesalfde – op julle uitgestort sodat julle deel het aan die salwing!
Die Gees van wysheid, insig, sterkte en die vrees vir die HERE is aan jou gegee! Wandel julle soos sy kinders? Is dit julle ervaring? Dan sal daar ’n oorvloed van vrede wees, ’n diepe vreugde as ons hierdie waarheid ervaar en daarna verlang dat hierdie waarheid vervul word. In ’n wêreld wat nie veel anders lyk nie, leef ons in ’n werklikheid wat baie anders is. Want die Koning regeer! En die kruis is die teken vir alle mense.
Vir jou! Kom na Hom toe! Word oorwin deur hierdie Koning en laat sy Gees jou verander. Buig jou rebelse knieë en lê vandag jou wapens neer. Lewe vir Hom in die krag van die Gees. Wandel soos kinders van die lig! Wandel soos mense wat vrygemaak is van die slawerny.
Amen.